Un dos eixos vertebrais da acción do goberno é a concepción da participación veciñal como unha calidade transversal que impregna toda a acción municipal. O obxectivo é promover a cultura da participación veciñal na vila de Cangas.
Así, a concellaría traballa, de xeito directo, coas asociacións locais co fin de facilitarlle o seu labor no municipio. Este portal pretende servir de punto de encontro para o asociacionismo local, tratándose dun espazo onde as entidades poden darse a coñecer e amosar o seu traballo no municipio, ademais de servir como nexo de comunicación entre os diferentes colectivos e a cidadanía en xeral.
Os Concellos deben establecer un rexistro para a inscrición das asociacións que actúen no ámbito municipal, nos termos e cos efectos previstos no artigo 236 do Regulamento de organización, funcionamento e réxime xurídico das entidades locais.
O Rexistro Municipal de Asociacións ten por obxectivo permitirlle ao Concello coñecer o número de entidades existentes no seu territorio, facilitar as relacións con elas e entre elas, coñecer os seus fins e a súa representatividade, facilitar e promover a iniciativa e a participación das entidades cidadás na xestión municipal, para os efectos de impulsar políticas municipais coherentes coas pretensións e necesidades da veciñanza, constituíndo un instrumento para consolidar un tecido social, baixo os criterios de obxectividade, imparcialidade e igualdade.
A QUEN ESTÁ DIRIXIDO?
A todas aquelas asociación sen ánimo de lucro legalmente constituídas que desenvolvan uns fins comúns encamiñados a defensa, fomento ou mellora dos intereses xenerais ou sectoriais da veciñanza do concello.
COMO FACELO?
Presentando a solicitude e documentación requirida no Rexistro Xeral do Concello.
Documentación requirida para a inscrición
- Formulario de inscrición.
- Copia compulsada da acta fundacional da Asociación.
- Copia compulsada dos Estatutos da Asociación, adaptados á Lei Orgánica 1/2002, de 22 de marzo, reguladora do Dereito de Asociación.
- Número de inscrición no Rexistro Xeral de Asociacións do Ministerio do Interior ou no Rexistro Autonómico de Asociacións.
- Certificado acreditativo das persoas que ocupen os cargos directivos, incluíndo nome, apelidos e DNI de cada unha delas.
- Certificado acreditativo do número de socios, que se renovará anualmente.
- Sede social (enderezo, teléfono e outros datos útiles para a mellor localización).
- Copia compulsada do CIF da Asociación.
- Orzamento do ano en curso, facendo constar os medios e fontes de financiamento propios ou externos se prevén.
- Programa de actividades do ano en curso.
- As entidades deportivas deberán presentar copia dos seus estatutos adaptados ao establecido na Lei 11/1997, do 22 de agosto, xeral do Deporte de Galicia.
Documentación requirida para a renovación da inscrición: Para os efectos da continuación da vixencia da inscrición, todas as entidades inscritas no rexistro municipal deberán presentar anualmente por rexistro, antes do 31 de marzo, a seguinte documentación:
- Formulario de renovación da inscrición.
- Orzamento e programa de actividades para o ano en curso.
- Memoria das actividades e actos realizados no transcurso do ano anterior.
- Número de socios e socias a 31 de decembro, expedido polo Secretario da Asociación.
- Calquera outra modificación que se producise con motivo da celebración da asemblea xeral, da cal deberá estender copia certificada polo Secretario da Asociación.