Ir o contido principal

Máis de 400 remeiros participarán na XIX Bandeira de Bateis

FacebookTwitterShare
Máis de 400 remeiros participarán na XIX Bandeira de Bateis

Este sábado terá lugar no porto do concello a XIX edición de Bandeira de Bateis, un evento deportivo que mobilizará a 430 remeiros pertencentes a 17 clubs achegados desde diferentes puntos da provincia de Pontevedra. Aínda así, desde a organización indícase que non se pode asegurar a realización da proba debido ás previsións meteorolóxicas, dato que se saberá con exactitude o próximo venres.

Se o tempo o permite, ás 16:00 horas do día 10 de marzo producirase o inicio da regata, que se desenvolverá en liña, en quedas lanzadas da mesma categoría cun intervalo dun minuto e con cinco minutos entre as distintas categorías. A orde de saída será a seguinte: promesa feminina, xuvenil feminina, absoluta feminina, infantil masculino, cadete masculino e xuvenil masculino.

O concelleiro de Ensino e Deporte, Xoán Carlos Chillón Iglesias, convida á veciñanza para que “participe desta gran festa deportiva e anime ás nosas tripulacións, que estarán representadas polo Club de Remo Vila de Cangas”, equipo organizador da proba no que “existe un gran protagonismo feminino. A el debémoslle agradecer todo o labor que vén desenvolvendo desde hai anos no sentido da promoción do deporte e da igualdade”.  

Como premios establécense dúas bandeiras (feminina e masculina) para os conxuntos con maior puntuación. No caso de empate, serán para a formación con máis vitorias.