Cangas

É a capital do termo municipal que hoxe supera os 25.000 habitantes. Ademais é onde se conforma o núcleo urbano da vila. Atópase no medio dunha ensinada que se abre entre Punta Rodeira (Coiro) e Punta Balea (Darbo). Está totalmente urbanizada con un longo paseo marítimo rodeado por xardíns, chamados Xardíns do Sinal. Nesta parroquia están os organismos administrativos do municipio así como os peiraos de pasaxeiros, de pesca e o deportivo.

O primeiro que chama a atención do que nos visita por primeira vez é a riqueza do seu patrimonio históricoartístico. Paga a pena perderse polas estreitas rúas da zona vella, descubrindo os exemplos de arquitectura popular mariñeira, as casas de patín ou as casas terreñas. Chegar ás preciosas prazas como a de Síngulis ou a do Costal e admirar os nobres edificios brasonados.

Aínda que, de seguro, o que máis o impresionará será a Excolexiata de Santiago, que data do século XVI. É preciso visitar detidamente este monumento e admirar a súa fronte renacentista, as súas portentosas bóvedas góticas e as súas tallas e retablos barrocos. Á saída e baixando pola Rúa Real, chegará aos Xardíns de Félix Soage, nos que se conservan importantes obras escultóricas de Xoán Piñeiro ou Francisco Asorey. A poucos pasos, nos Xardíns do Sinal, o paseo que bordea a vila ata chegar á praia de Rodeira, amósanos dunha beira a Capela do Hospital, monumento emblemático do século XVIII, e da outra o porto deportivo.

Que visitar

• Excolexiata de Santiago de Cangas.
• Pazo da subida de Síngulis. 
• Casas de Patín.
• Casa da Bola.
• Paseo marítimo. 
• Barrio de O Outeiro.

Festas e celebracións

• Festas do Cristo, o último domingo de agosto. 
• Semana Santa de Cangas.
• Argálica.
• Festival de jazz.