Coiro é, fundamentalmente, unha parroquia de interior, e o seu principal atractivo son lugares como a Carballeira de Coiro, un dos espazos naturais protexidos cos que conta o noso concello. Estamos a falar dunha fraga tipicamente atlántica onde se mesturan especies coma carballos, castiñeiros, salgueiros, ou bidueiros entre outras. O río Bouzós, que atravesa o lugar, esconde numerosos muíños. No muíño de «Fausto», que foi restaurado, o viaxeiro pode comprobar como funcionaban estes curiosos enxeños.
Coiro é tamén terra de pazos, pertencentes a importantes liñaxes fidalgas. Paga a pena deterse a contemplar os de A Retirosa e O Xistro. Tamén son abondosos os edificios brasonados, como o do Cruceiro, que aínda ostenta o escudo da Inquisición.
Tamén a Casa Reitoral amosa dúas boas labras heráldicas, representando unha delas á poderosa familia dos Mondragón, marqueses de Santa Cruz de Rivadulla. Pero o máis impresionante é a Igrexa de San Salvador, obra que os irmáns Novas realizaron no 1784, e na que o máis destacable é a torre cunha rica ornamentación barroca.
Lugares de Coiro: Agualevada, Boubeta, Carballal, Castrillón, Costeira, Cruceiro, Debesa, Espírito Santo, Forte, Xielas, Gondorán, Gruncheiras, Igresario, Miranda, Outeiro, Parada, Pedra da Lan, Reboredo, Retirosa, Romarigo, Rosada, Rúa, Trigas e Verín.
Praias
Canabal, Praia dos Alemáns e Rodeira.
Que visitar
- Carballeira de Coiro.
- Igrexa de San Salvador, casa reitoral e miradoiro.
- Casa museo de A Mangallona.
- Muíño de Fausto, no río Bouzós.
Festas e celebracións
- Festas do Espírito Santo: variable no mes de xuño.
- Festas de Santo Domingo, a principios de agosto.
- Festas de San Salvador, o 6 e 7 de agosto.
- Festas de San Cosme, o 26 de setembro.
- Festa do Muíño.