Baixando as escaleiras situadas á dereita da igrexa, atopamos esta casa, que tanto ela como a que ten enfronte, son dous belos exemplos das típicas “casas de patín”, as casas mariñeiras por excelencia de Cangas.
A casa Barbicas actualmente acolle na planta alta a oficina do PEPRI (Plan especial de protección e reforma interior).
Esta casa ten a súa historia. Dise que na época medieval, sobre o s. XVI foi a primitiva Capela do Hospital. No seu interior conserva un arco de medio punto con motivos de bólas, sabéndose de certo que foi a porta de entrada da primitiva capela, queimada polos turcos no 1617.
Posteriormente, no século XVIII foi cárcere, quedando inda pequenos barrotes en varios pertuxos. Durante o s. XIX e ata o 1900 aproximadamente foi sede do concello. A principios do s. XX foi escola, a popular “Escola de Barbicas”, chamada así polo seu mestre D. Manuel Mosquera. E xa, nos últimos anos, e antes da súa rehabilitación, foi a dependencia municipal onde os traballadores do lixo deixaban as súas pertenzas persoais.
A comezos do 2000 rehabilitouse, poñéndose en valor como un dos elementos arquitectónicos patrimoniais mais importantes de Cangas.