Núcleo primixenio da vila de Cangas, é unha das prazas mellor conservadas da zona vella. Mantén a súa estrutura orixinal e case non sufriu reformas. As súas estreitas rúas esconden fermosas «casas de patín» alternadas con outras modalidades de arquitectura mariñeira como a «Casa Terrera» e a «Casa con Sobrado» (entre medianeiras). Debido a que é unha praza pechada que conta con moi boa acústica, no verán represéntanse obras de teatro como as obras infantís da Mostra de Teatro e celébranse varios concertos ao aire libre como os do Canjazz.
